Турција бара Кипар да се подели на две држави

Добивај вести на Viber

Турција бара Кипар да се подели на две држави, нешто што за Атина е провокација. 

Турскиот претседател Реџеп Таип Ердоган говори за „две посебни држави“ на Кипар, отфрлајќи го обединувањето на островот како решение на кипарското прашање.

Ердоган вели дека има два народи и две посебни држави на Кипар. 

Верува дека плановите за обединување се минато.

„Потребни се преговори за да се дојде до решение кое би се засновало на две посебни држави“, кажа тој во говор на северниот дел на Кипар.

Последните преговори за мир меѓу кипарските Грци и кипарските Турци во 2017 под покровителство на Обединетите нации, а врз основа на идејата за обединување на островот, пропаднаа. 

Турскиот претседател се сретна со новоизбраниот лидер на самопрогласениот Северен Кипар, Ерсин Татар.

Татар, поранешниот премиер, победи на претседателските избори минатиот месец што значи дека може да дојде до понатамошно заострување на односите со меѓународното признатата влада во Никозија.

Турција е единствената земја која го признава Северен Кипар како независна држава.

Кипар се раздвои по турската инвазија во 1974, која беше одговор на државниот удар со кој Грција се обиде да го припои островот.

Ердоган изјави дека Северен Кипар и Турција повеќе нема да дозволуваат „дипломатски игри“ околу прашањето за меѓународното право на истражување ресурси во источниот Медитеран.

Кипарскиот претседател Никос Анастасијадес ја оквалификува посетата на Ердоган како провокација и политика на свршен чин која ја спроведува Анкара и со тоа покажува дека не го почитува меѓународното право.

„Турција и нејзиниот претседател ја поткопуваат перспективата за соодветна атмосфера што ја бара генералниот секретар на ОН за да ја почне иницијативата кон решавање на кипарското прашање“, кажа Анастасијадес пред пристигнувањето на Ердоган.

Грција смета дека посетата претставува „директно кршење на резолуциите на ОН“.