Турција ќе ја затрупа Европа со мигранти?
Објавено во: Балкан 16 Март, 2017
Турскиот шеф на дипломатијата, Мевљут Чавушоглу се закани дека еднострано ќе го раскине договорот за емигрантите и бегалците кој во март 2016 година го потпиша со Европската Унија и кој овозможи значително намалување на приливот на емигранти и бегалци во Европа.
„Сѐ уште не сме ги информирале нашите (европски) соговорници, сѐ е во нашите раце“-изјави Чавушоглу во интервју за турската 24 ТВ, во време на тензии со повеќе земји на ЕУ.
Во случај на еднострано откажување на договорот за емигрантите Европа најверојатно повторно лесно би била затрупана со голем емигрантски бран.
„Сега можеме да кажеме „повеќе нема да го применуваме и готово“. Не ни треба дозвола од никого“- додаде Чавушоглу.
Тој ѝ замери на Европската Унија дека не одобрила либерализација на визите за кратки престои на турските државјани во ЕУ, иако тоа беше предвидено со договорот.
Договорот за емигрантите ЕУ и Турција го потпишаа во Брисел пред една година за да го сопрат секојдневното пристигнување на илјадници емигранти со бродови на грчките острови во Егејското Море.
Со договорот покрај либерализацијата на визите беа предвидени уште неколку отстапки, меѓу кои и финансиска помош за Анкара од 3 милијарди евра со можност за продолжување кога средствата ќе се потрошат.
Односите на ЕУ и Турција се влошија откако Германија и Холандија минатата недела не им дозволија на турски министри на нивна територија да присуствуваат на митинзи за поддршка на референдумот за проширување на овластувањата на претседателот Реџеп Таип Ердоган.