УЧИЛИШНОТО ЅВОНЧЕ ЗАЅВОНИ ВО РЕГИОНОТ: Во Србија 97 отсто од родителите одлучиле децата да им одат во училиште
Објавено во: Балкан 01 Септември, 2020
Со заштитни маски
и следејќи ги зацртаните протоколи, учениците од основните и од средните
училишта во Србија и во Словенија ја започнаа новата учебна година.
Исклучетелен е податокот дека во соседна Србија, каде епидемиолошката состојба и не е во најдобро светло, родителите дури во 97 отсто одлучиле нивните деца да одат во училиште, односно наставата да ја следат со физичко присуство. Инаку и таму, во сите училишта, наставата е организирана под посебни услови и протоколи. Маските се задолжителни, во училниците постојано се прави дезинфекција, а има и задолжени кои следат дали се одржува потребното растојание. Според српскиот министер за просвета, Младен Шарчевиќ, во 38 проценти од училиштата во земјата нема да има потреба учениците да се делат во групи до 15 ученици, бидејќи тие училишта располагаат со многу мал број на деца. .
Училишното ѕвонче го означи стартот на учебната година и во Словенија, каде што училиштата се должни да обезбедат маски за децата што не носат од дома. Препораките за носење маски ќе се прилагодуваат секој петок за неделата што следува, а тоа секако ќе зависи од актуелната епидемиолошка состојба.
Во текот на следната недела се очекува да почне учебната година и во Грција, каде што веќе имаат искуство со реализација на настава во услови на епидемија, бидејќи таму и претходната учебна година, учениците ја завршива во клупите под посебни мерки и протоколи.