УГОСТИТЕЛИТЕ ТВРДАТ: Во земјава има над 50.000 регистрирани сметки со криптосредства, сакаат и тие да издаваат и тргуваат

Добивај вести на Viber

Регулатива, според која законски ќе регистрираат македонска крипто менувачница, ќе издадат македонски крипто средства - коини, односно крипто средства - токени за угостителската индустрија и законски ќе постават крипто АТМ апарати кај реномирани угостителски објекти низ повеќе градови, се барања на Независната угостителска комора, НУК.

Оваа комора, како што соопштуваат до јавноста, испратила писмо до претседателот на Владата, Народната банка, Министерството за финансии, Министерството за економија, УЈП и Централниот регистар со кое се бара да се изготви регулатива која ќе овозможи издавање на глобално крипто-виртуелно средство наменето за користење на угостителски услуги и инвестиции во македонски и регионални угостители.

„Изминатите месеци сведоци сме на експанзија од локална и глобална популаризација на работење, тргување и издавање на криптовалути. Согласно постојната македонска законска регулатива и информациите на Народна банка за криптовалути инвестирање, тргување и содавање на криптовалути, во Македонија не е забрането, туку истото не е законски регулирано. Моментално сите трансакции и инвестиции во крипто средства се одвиваат преку разни странски крипто менувачници или со размена на крипто средства помеѓу физички лица при што не се води евиденција односно се нема контрола на готовинските текови на пари“, пишува во дописот на Независната угостителска комора.

Затоа, како што велат угостителите, барат регулатива според која законски ќе регистрираат македонска крипто менувачница, ќе издадат македонски крипто средства – коини односно крипто средства – токени за угостителската индустрија и законски ќе постават крипто АТМ апарати кај реномирани угостителски објекти низ повеќе градови.

„Воведувањето на законска можност за трговија и инвестиција во македонски криптовалути за угостителската индустрија во услови кога угостителите трпат енормни штети и загуби поради пандемијата со ковид-19 ќе допринесе инвестиции во свеж надворешен капитал со што ќе може директно да се помогне во нивната ревитализација и анимирање на туризмот и угостителството во привлекување на потенцијални странски гости-туристи кои ќе можат на лесен и брз начин да инвестираат и плаќаат со криптовалути кај македонските угостители со што ќе може да се зголемат и забрзаат приходите од туризмот.

Официјализирање на работење со крипто валути со официјална регистрација на македонска менувачница на криптовалути со која ќе се воведат и КРИПТО АТМ апарати во реномирани угостителски објекти (ресторани и хотели) ќе може да се врши законска и официјална размена на криптовалути низ цела Македонија за домашни и странски гости“, предлагаат од НУК.