Уште две бремени малолетнички - Што се случува во ЈУ „25 Мај“?

Добивај вести на Viber

По случајот со силуваното 13-годишно девојче, штитеник на Јавната установа за згрижување на деца со воспитни и социјални проблеми „25 Мај“, пријавени се уште две малолетни девојчиња од оваа установа дека се трудни. Едното ја прекинало бременоста, но второто не сака да абортира и инсистира да го роди бебето.

Засега уште не е официјално потврдено дали и овие две малолетнички биле злоупотребувани, како што беше случајот со 13-годишното девојче кое ја дигна јавноста на нозе.

За оваа веста потврдија и од Клиниката за гинекологија, каде што се води бременоста на децата,објави „Независен весник“.

„Едното девојче за кое медиумите веќе пишуваа, како и уште едно друго, се ‘затворени’, односно бременоста им е прекината. Третото девојче има 17 години и не сака да абортира. Навистина, не би сакале да ги жигосаме тие деца со кои судбината грубо си поиграла. Да им ја видите само болката во очите… Од наша страна е направено сѐ прекинот на бременоста да биде изведен најпрофесионално за децата во иднина да немаат репродукциски проблем, кога веќе психолошки се оптоварени“, велат од Клиниката за гинекологија.

На ужасите во „25 Мај“ како да им нема крај. Вознемирувачките информации од таму говорат за тотално потфрлање на институциите, кои место да се грижат за децата што, или немаат родители или доаѓаат од дисфункционални семејства, се препуштени сами на себе, а сами, слаби и незаштитени се лесна мета за насилниците, криминалците и бездомниците.

Извор: „Независен весник“