Уште две лица добија притвор за „крвавиот четврток“

Добивај вести на Viber

Судија на претходна постапка им одредил притвор уште на две лица, М.М и С.М., осомничени за насилствата во Собранието од 27 април годинава, кои вчера се спроведени на распит во Кривичниот суд во Скопје.

Осомничените против овие одлуки имаат право на жалба до Кривичниот совет на Основниот суд Скопје 1, во рок од 24 часа по приемот на решенијата.

Сега вкупниот број на осомничени, кои добија притвор изнесува 15 лица, меѓу кои се и поранешниот министер за внатрешни работи и директор на Бирото за јавна безбедност, Митко Чавков, како и Богдан Илиевски и оперскиот пејач Игор Дурловски, кои беа дел од организаторите на протестите „За заедничка Македонија“.

Куќен притвор добија шестмина осомничени, меѓу кои и режисерот Борис Дамовски и актерот Владо Јовановски, кои беа дел од организаторите на протестите на иницијативата „За заедничка Македонија“.

Обвинителството за гонење организиран криминал и корупција отвори истрага против вкупно 36 лица, кои се товарат за терористичко загрозување на уставниот поредок и на безбедноста на државата.

Комисијата за деловнички и мандатно-имунитетни прашања денеска едногласно, со пет гласа „за“ и без воздржани или против, го одобри барањето на судот и донесе заклучок да му предложи на Собранието да им се одземе имунитетот на пратениците Сашо Василевски, Љубен Арнаудов, Крсто Мукоски, Јохан Тарчуловски, Љупчо Димовски и Жаклина Пешевска.