УШТЕ ЕДНА ЗЕМЈА ГИ КРАТИ ПАРИТЕ: Помал детски додаток за гастербајтерите
Објавено во: Економија 21 Февруари, 2017
По Германија, и Австрија има намера да ја намали висината на детските додатоци што ги примаат децата на странските работници чии семејства не живеат во Австрија и да ги прилагоди на стандардот на земјите во кои живеат.
Висината на детските додатоци за странците би се прилагодила според животните услови и стандардот на земјите од кои доаѓаат работниците.
Оваа информација ја објавија денеска словенечките медиуми.
Предлог законот што оваа недела во парламентот ќе го поднесат двете најмоќни австриски партии, Народната партија и социјалдемократите СПО, кои се дел од владејачката коалиција, предвидува дека на тој начин ќе имаат заштеда од 100 милиони евра во државниот буџет.
Најмногу пари на име „детски додаток“ гастербајтерите лани од Австрија добивале во Унгарија, 65 милиони евра, а понатаму следат Словачка со 60 и Полска со 37 милиони евра. Дел од детските додатоци се испраќаат и во Романија, Чешка и Словенија.
Австрија годишно за детски додатоци исплаќа 3,4 милијарди евра, а со намалувањето на овој додаток за децата на странците, трошоците би се намалиле за околу 100 милиони евра затоа што детските додатоци во земјите од каде што доаѓаат работниците се значително пониски.
Во земјите од кои има најмногу гастербајтери, детскиот додаток се движи од 20 до 40 евра, додека во Австрија тој изнесува од 110 до 160 евра.