Уште една земја се откажува од зимското сметање на времето

Добивај вести на Viber

Одлука целосно да прекине да го користи зимското сметање на времето донесе Мароко. 

Во оваа земја преку целата година ќе функционираат според летното сметање на времето.

Одлуката е донесена два дена пред поместувањето на часовникот за еден час наназад, според зимското сметање на времето, пренесе Би-Би-Си.

Во 3 часот ноќеска завршува летното сметање на времето и почнува зимското, при што со поместување на часовникот за еден час наназад времето во 3 часот ќе се смета како 2 часот.

Стрелките вечерва ќе се поместат и во земјите на Европската Унија која што неодамна усвои одлука да се укине промената на времето.

Додавањето на еден час дневна светлина попладне генерално им оди во прилог на продавниците, спортските активности, земјоделството и други дејности кои се поврзани со дневна светлина. Покрај тоа, продолжувањето на попладневната дневна светлина изгледа го намалува бројот на жртви од сообраќајни незгоди. Во САД пресметале дека летното сметање на времето заштедува 1% од потрошувачката на нафта.

Од друга страна, поместувањето на часовниците го комплицира одржувањето на сатницата, и може да ги поремети состаноците, возните редови, медицинските уреди, наплатата на разни услуги, итн. Особен хаос се создавал во минатото поради неконзистентности помеѓу државите во сметањето на времето.