Условна казна за Лазаров за насилството во општина Центар
Објавено во: Македонија 24 Ноември, 2017
Судот донесе условна пресуда за Томислав Лазаров, поранешен претседател на општинскиот комитет на ВМРО-ДПМНЕ во Центар, кој во постапката сам ја призна вината за делото истакнуваќи дека се кае за истото. Лазаров е осуден на 6 месеци условно со тоа што не треба да стори кривично дело во наредните две години.
Лазаров уште еднаш изрази каење и ветување дека нема да стори друго кривично дело и се откажа од правото на жалба за висината на казната.
Тој е четвртообвинет за случајот за насилство, дека го поттикнал и организирал дел од членството на ВМРО-ДПМНЕ на протест, со наводен мотив дека ќе се протестира поради рушењето на црквата „Св. Константин и Елена“, која беше во фаза на градба на бул. „Македонија“, иако тоа воопшто не било точка на дневниот ред на седницата.
Во предметот „насилство во Центар“ обвинети се и лидерот на ВМРО-ДПМНЕ и поранешен премиер Никола Груевски, поранешниот министер за транспорт и врски Миле Јанакиески, пратеничката Даниелa Рангелова и уште 11 други лица. Судењето за овој случај на СЈО треба да продолжи на 29 ноември.
СЈО случајот го поведе врз основа на прислушуваните телефонски разговори од кои целата јавност имаше можност да чуе како Груевски нарачува демонстрант да влезе во општината и да му удри неколку јаки шамари на тогашниот градоначалник Жерновски.При демонстрациите беше нанесена поголема материјална штета, а една советничка беше повредена.