Вајгл: Ситуацијата во Македонија е сериозна и можни се и најцрните сценарија
Објавено во: Македонија 24 Март, 2017
Европратеникот Иво Вајгл изјави дека ситуацијата во Македонија е сериозна и дека се можни и најцрните сценарија, како и дека лидерот на ВМРО-ДПМНЕ, Никола Груевски им кажал дека ќе оди до крај, бидејќи не сака да лежи во затвор, пренесува Ал Џезеира.
„Ситуацијата во Македонија е многу сериозна, но сè уште не е крајно алармантно. Секој ден нешто се случува. Сега во Собранието се договорија за некаква кадровска комисија. Оние кои треба да формираат влада дозволија претседателот на Комисијата да биде од редовите на ВМРО-ДПМНЕ, така што ова е знак на толеранција“- изјавил Вајгл за агенцијата Анадолија.
Според пратеникот, тие кои што сега имаат парламентарно мнозинство, предводени од СДСМ, имаат и друга можност за формирање влада.
„Тие можат, на основа на мнозинството кое што го имаат, доколку дојде до свикување на парламентот, да изберат влада и да го заобиколат Иванов“ - смета Вајгл.
Вајгл вели дека ВМРО-ДПМНЕ безкомпромисно повикува луѓе на улица и тие маршираат. Се плаши дека работите на улиците може да ескалираат. Не сака да зборува за најцрни сценарија, меѓутоа, такви се можни, смета Вајгл и додава дека секој ден има сè повеќе поттикнување на омраза против Албанците. Вајгл смета дека и другата страна го прави истото.