(ВИДЕО) Девојка е уапсена затоа што танцувала со „оскудна облека“ и без марама
Објавено во: Свет 09 Јули, 2018
Жени во Иран танцуваа во јавност и објавуваат видеа на интернет во знак на протест поради апсењето на младата тинејџерка Медех Хоџабри, која објавувала видеа како танцува без хиџаб на својот Инстаграм профил.
Хоџабри имала илјадници следбеници поради нејзините видеа на кои танцува на звуците на иранските, на западните поп и рап песни. Танцовите најчесто биле во нејзината соба без марама на главата, која е задолжителна за жените кога се појавуваат во јавност во Иран.
Покрај за облеката, иранските власти имаат и строга забрана за танцување со припадници од другиот пол во јавност, освен пред блиски членови на семејството.
Ова поттикна голем број корисници на социјалните мрежи да објавуваат пораки и видеа во поддршка на младата девојка, користејќи хаштази кои можат да се преведат како #Танцувањето_не_е_криминал.
Државната иранска телевизија пренела дека Хоџабри го признала делото во петокот. Последниве недели се уапсени уште неколку жени кои танцувале онлајн.
Ова не е прв пат во Иран да се апсат лица поради танцување. Претходно оваа година, службено лице од градот Машад било уапсено по излегување на снимка која покажува мажи и жени кои играат во трговскиот центар во градот. Во август беа уапсени шест лица поради танцување зумба.