(ВИДЕО) Два силни земјотреси ја погодија Централна Италија: Луѓето стравуваат да не се повтори Аматриче!

Добивај вести на Viber

Земјотрес со јачина од 5,4 степени според Рихтеровата скала ја потресе вечерва централна Италија. Ова се случува само два месеци откако во силен земјотрес загинаа приближно 300 лица и беа потрупани со земја неколку мали гратчиња, пренесе Ројтерс. Подоцна беше регистриран втор силен земјотрес со интензитет од 5,9 степени според Рихтеровата скала.

Според првичните информации две лица се повредени.

Геофизичкиот институт на САД првично ја одреди силата на потресот од 5,6, но подоцна ја промени на 5,4. Земјотресот е регистриран на длабочина 9 километри на границата меѓу областите Марке и Умбра. Епицентарот е во општината Кастелсантанджело Сул Нера со население 318 лица.

По првиот следеа уште три последователни потреси на длабочина 8 километри со интензитет соодветно 2,6, 2,5 и 2,8 степени според Рихтеровата скала.

Во епицентарот на потресот има штета, но нема податоци за жртви. Градоначалникот на Кастелсантаджело Сул Нера изјави дека во гратчето нема струја и жителите се во очекување на Цивилната заштита.

Потресот е почувствуван во Рим, Лакуила, Перуџа, Фиренца и Неапол, а на голем број места е прекината струјата. Многу жители на Рим излегоа на улиците, но нема податоци за настрадани граѓани и згради.

Во Аматриче - гратчето кое настрада најмногу сериозно при претходниот земјотрес, овој потрес исто така бил почувствуван. Според сеизмолозите има директна врска помеѓу двата потреси.