Владата ја усвои преговарачката структура за преговорите со Европската Унија
Објавено во: Македонија 05 Септември, 2022
На 78-та владина седница е усвоена преговарачка структура за преговорите со Европската Унија(ЕУ).
На седницата, премиерот Ковачевски се заблагодари на сите членови за досегашните заложби и трудот вложен во евроинтегративниот пат на Северна Македонија.
Од особено значење за натамошно дефинирање на активностите кои ќе следат беше усвојувањето на ревидирана структура за преговори за пристапување на Република Северна Македонија во Европската Унија, која го дава координативниот механизам за одвивање на преговорите со Унијата.
Информацијата со предлог за ревизија на координативниот механизам на Република Северна Македонија за пристапни преговори со Европската Унија и Одлуката за воспоставување на структура за преговорите беше едногласно усвоена од членовите на Владата.
Новата усвоена структура за преговори ја сочинуваат:
1. главен преговарач за преговори за пристапување на Република Северна Македонија во Европската Унија, кој ја врши заменик-претседателот на Владата на Република Северна Македонија задолжен за европски прашања, Бојан Маричиќ, и
2. заменик на главниот преговарач, која ја врши државниот секретар за европски прашања, кој е воедно и претседавач на комитетот за стабилизација и асоцијација, Дрита Абдиу Халили.
Остануваат телата предвидени во 2019 година и тоа:
- Комитетот за преговори за пристапување на Република Северна Македонија во Европската Унија претседаван од претседателот на Владата како највисоко политичко тело на Владата за координација на пристапните преговори,
- Државната делегација за преговори за пристапување на Република Северна Македонија во Европската Унија, која ќе ја предводи министерот за надворешни работи Бујар Османи,
- Групата за преговори за пристапување на Република Северна Македонија во Европската Унија како стручно тело,
- Работниот комитет за европска интеграција,
- Работни групи за пристапни преговори како помошни тела на Работниот комитет.
Дополнително, СЕП се задолжува да биде и депозитар на целокупната документација поврзана со пристапните преговори како и да има координатор во сите работни групи надлежен за методолошките и процесните аспекти и координација со останатите тела на структурата за преговори. Воедно, СЕП презема надлежност и во подготовката на потребните правни акти со кои ќе се дефинираат процедурите на работење на телата.