Владата најави сет мерки за компаниите кои ќе испорачаат раст за Македонија
Објавено во: Економија 13 Септември, 2017
Владата утре ќе ги објави сетот мерки наменети за економијата.
Oва денеска го најави вицепремиерот за економски прашања Кочо Анѓушев. Мерките се за компаниите кои можат да испорачаат раст и прогрес на Македонија.
Тие содржат три главни столба, ќе бидат подеднакво наменети и за домашните и странските инвестиции, а главен критериум ќе биде резултатот од работењето.
„Сите оние компании кои се подготвени да испорачаат раст на својот приход во текот на тековната година ќе бидат финансирани и поддржани од државата во текот на наредната година во облик на поврат на одредени средства, но тие средства нема да бидат враќани во дискрециско право на преговарање, туку средствата ќе бидат враќани исклучиво во одредени критериуми и подеднакви за кој било инвеститор дали е гринфилд инвестиција или станува збор за постојни економски капацитети“ - рече Анѓушев.
По исти критериуми ќе бидат поддржани сите инвеститори.
„Првиот столб на поддршка ќе биде гринфлд и браунфилд инвестиции, во ТИРЗ или надвор од нив. Компании што веќе работат и ќе бидат помогнати за тие и понатаму да инвестираат и растат. Третата група ќе бидат т.н. таргетирани компании, а четвртата компаниите кои се во стечај и ликвидација и нивно рестартирање“ - вели Анѓушев.
Вториот столб е практично за поддршка на извозот. Поддршката ќе биде поголема како се зголемува инвестирањето.
„Предвидено е секоја компанија која ќе го зголеми својот извоз во фискалната година што се анализа во споредба со претходните три години ќе биде поддржана на начин што ќе има процент на поврат на нивните инвестиции што ги направиле за растот на тој извоз“ - рече Анѓушев.
Третиот столб ќе биде наменет за мали и средни претпријатија каде има цел сет мерки, а некои се направени по израелски пример.
По објавување на мерките ќе биде отворена дискусија со стопанските комори, финансиски институции, МАНУ, универзитетите и сите кои ценат дека можат да придонесат пред тие да бидат донесени.