Владата повлече пари од ЕУ за да им дава бескаматни кредити на фирмите
Објавено во: Економија 15 Октомври, 2020
Владата ќе и префрли пари на Развојната банка, а таа треба на фирмите да им додели кредити од третата бескаматна кредитна линија за поддршка на микро и мали претпријатија. Одлуката помина на синоќешната владина седница. Станува збор за бескаматна кредитна линија со грант компонента наменета за микро и мали претпријатија погодени од КОВИД-19 (Ковид 3). Министерството за финансии треба да го потпише договорот со Развојната банка додека Министерството за економија да префрли 60.000.000 денари ( нешто помалку од еден милион евра) на посебна сметка на оваа банка.
„Финансиските средства за бескаматна кредитна линија со грант компонента наменета за микро и мали претпријатија погодени од КОВИД-19 (Ковид 3) се повлечени од 50-те милиони евра награда за успешност заради целокупниот напредок во процесот на Европска интеграција на Северна Македонија, за кои Владата со официјален допис се обрати до Европската комисија дека овие средства ќе се користат за опоравување на земјата од последиците предизвикани од пандемијата со КОВИД-19, стои во соопштението од Владата.