ВМРО-ДПМНЕ ќе биде дел од седницата за новата влада, но се жали на кратките рокови
Објавено во: Македонија 29 Мај, 2017
Пратениците на ВМРО-ДПМНЕ ќе бидат дел од седницата на која ќе се расправа за составот на новата влада предложена од Зоран Заев и нејзината програма, но уште сега упатуваат критики за краткиот период во кој треба да се дебатира.
- Начинот на кој Заев се обидува да го скрати времето за анализа на програмата што ја нуди и нејзиниот кадровски состав на идната Влада е краен недемократски чин. СДС збореше за демократија и за јавна дебата, а на пратениците, на стручната јавност и на граѓаните им го ускратува правото на потребно време за анализа и дебата на главните проектни и главните кадровски политики на новата влада. На пратениците кои што не се дел од собраниското мнозинство не им се остава ниту минимум време за квалитетна подготовка на дискусија за или против новиот состав и новата програма на новата Влада. Владите и мандатарите и во 2002 и во 2006-та, и во 2008-ма, 2011-та и 2014-та година секогаш давале минимум 12 дена простор и време за јавна дебата за разгледување и анализа на владините програми и предложените кандидати за министри. И секогаш не само парламентарната опозиција туку и јавноста, стручната фела, новинарите и граѓаните ова време го користеле за градење на своите аргументи, за или против за предложените проекти или предложениот состав на новите влади, рече Антонио Милошоски на денешната прес конференција на ВМРО-ДПМНЕ.
Брзиот предлог на Заев доаѓа како што вели да не се губи повеќе време и како што вети што побрзо да се спроведат непходните реформи па затоа нема да чека ни да истече законскиот рок од 20 дена од добиениот мандат.