ВМРО-ДПМНЕ: Новите судии во апелација имаат двојно помал стаж, но партиска поддршка

Добивај вести на Viber

Опозициската ВМРО-ДПМНЕ обвини за скандал при избор на новите судии, особено за тие што се нанзачени во Апелациониот суд во Скопје бидејќи според нив кандидатите имало двојно помал стаж од некои колеги како и помалку освоени бодови врз што се базира оценката за одреден судија, но затоа пак ова е диктат на партијата на власт.

„СДС врши брутален притисок и невидена партизација.  Судскиот совет отворено и под политички диктат го прекрши законот за судови во делот за избор на судии. Согласно член 46 став 1 алинеја 2 од законот за судови за судија за Апелациониот суд може да биде избрано лице кое: е оценет со највисока позитивна оценка и во однос на другите пријавени лица има добиено најголем број на бодови. Новоизбраните судии кои ги избра владата на Зоран Заев имаат помали оценки и помал стаж. Судии со дупло помал стаж и драстично помалку бодови се избрани за судии во Апелација. Тоа е така бидејќи зад нив стои партијата на власт. За судии во Апелациониот суд се избраа сопругата на членот на ДИК од СДС, Тања Милева и кумот на висок функционер од СДС, Зоран Герасимовски“, стои во соопштението на ВМРО-ДПМНЕ.

Опозицијата уште еднаш го повика Јавното обвинителство да реагира, и да го испита работењето на дел од членовите на Судскиот совет и, како што велат,  јасното кршење на законот за судови член 46 став 1 алинеја 2.

„Со оваа одлука која е донесена од страна на владата на СДС очигледно се нарушени и барањата за реформи и препораките на Прибе, со што ВМРО-ДПМНЕ повикува и на реакција на Европската Комисија и сите релевантни субјекти на меѓународната заедница“, бара опозицијата.