ВО ПРОГНОЗИТЕ Е И МАКЕДОНИЈА: Сепак на Балканот ќе има прекројување на граници?
Објавено во: Балкан 19 Февруари, 2018
Весникот „Економист“ од Лондон пишува дека ако Србија и Косово се договорат да разменуваат територии, тој процес на Балканот не би можел да биде запрен и би имал големи последици. Весникот пишува дека токму поради тоа би требало да се намали значењето на националните граници.
„Тука се Србите кои живеат во Косово и во БиХ, каде имаат сопствена република, Албанците и Бошњаците (муслимани) кои живеат во Србија и Грците во Албанија“- наведува весникот.
Весникот потсетува дека во 1923 година Грција и Турција договориле размена на територии со што околу два милиони луѓе се раселени. Во анализата се потенцира дека тоа било насилно преселување, но двете земји оттогаш не војувале.
Лидерите за време на војната во Југославија сметале дека етничкото чистење е најдобар начин за создавање на нови нации-држави без проблематични малцинства, пишува весникот.
„До 1995 година подрачјата на кои историски живееја Срби во Хрватска останаа празни, а стотици илјади Срби, Хрвати и Бошњаци на сличен начин беа иселени од своите домови во Босна“- додава весникот.
Голем број Срби во 1999 година го напуштија Косово, а околу 120 илјади остана да живеат таму, па поради тоа српските власти сега сакаат да разговараат за размена на делови со Косово.
„Економист“ оценува дека доколку започнат разговори за прекројување на границите на Косово и Србија, тоа би можело да влијае врз балканските заедници.
Во таков случај, според лондонскиот весник, лидерите на босанските Срби би организирале референдум за иднината на Република Српска, Хрватите би поднеле тужба, а Бошњаците би се бореле да спречат распад на нивната земја.
Во меѓувреме Албанците во западна Македонија и во Црна Гора ќе бараат да се приклучат кон Голема Албанија, оценува весникот.