ВОЈНИЦИТЕ СЕ ПОВЛЕКОА ОД УЛИЦИТЕ: Eве што се случува во Зимбабве
Објавено во: Свет 26 Ноември, 2017
Од улиците на Зимбабве војниците се вратија во касарните.
Ситуацијата е мирна, а продавниците, пазарите и рестораните работат и ништо не го попречува движењето.
Животот во Хараре почнува нормално да функционира по оставката на Роберт Мугабе и стапувањето на должност на новиот претседател, Емерсон Мнангагва.
Судот до утре ќе го држи под специјален надзор министерот за финансии и економски развој Игнатиус Чомбо, против кого се покренати обвиненија за корупција, а ќе се разгледа можноста за негово ослободување под гаранција.
Под полициска контрола останува и лидерот на младината на владејачката партија Африканска национална унија на Зимбабве-Патриотски фронт (ЗАНУ-ПФ), Кудзи Чипангу.
Чомбо и Чипангу беа дел од групата која беше формирана околу сопругата на поранешниот претседател, Грејс Мугабе, наречена Г40 (Generation 40). Повеќе нејзини членови се уапсени под обвинение за злоупотреби за време на настаните пред оставката на Мугабе на 21 ноември.
Мугабе по 37 години си замина од власт. На улиците се славеше поради неговото заминување.