Wikileaks се наостри против Трамп, ја бара снимката со екс директорот на ФБИ
Објавено во: Свет 13 Мај, 2017
Wikileaks можеби ја менува својата агенда откако објави дека ќе плати 100.000 долари за снимка од разговорот на американскиот претседател Доналд Трамп и екс директорот на ФБИ Џејмс Коми, кој ја водеше истрагата за негова поврзаност со руски агенти.
Пораката е објавена на Твитер-профилот на Wikileaks неколку часа откако Трамп, исто така на Твитер, го предупреди Коми да не оддава премногу информации на медиумите за нивната средба.
Њујорк тајмс пренесе дека колегите на Коми изјавиле дека на вечерата на поранешниот директор со Трамп во јануари, од него била побарана лојалност. Коми, според тврдењата, тоа го одбил и понудил „чесност“. Трамп ги негираше тврдењата.
Wikileaks на некој начин му помогна на Трамп да победи на изборите во САД со објавата на хакираните мејл пораки од изборниот штаб на Хилари Клинтон, а иако се веруваше дека има документи и докази за поврзаност на милијардерот со Русија по налог на руските служби истите беа премолчени. Овој потег на Wikileaks може да се смета и за блеф за да покажат дека не се пристрасни во американската политика.