ЗА ВРАЌАЊЕ НА ОДЗЕМЕНИТЕ ИМОТИ ВО СОЦИЈАЛИЗМОТ ДОСЕГА ПЛАТИВМЕ 390 МИЛИОНИ ЕВРА - ќе бидат потребни уште две емисии обврзници и уште пари

Добивај вести на Viber

Процесот на денационализација во земјава никако да заврши, иако државава досега за таа намена има потрошено близу 390 милиони евра.

За да се раздолжи државата кон сопствениците на присилно одземените имоти за време на социјализмот, ќе бидат потребни уште пари.

Практично, тие имоти им биле одземани на сопствениците после втората светска војна, под образложение дека се потребни за општокорисни цели.

Иако досега беа извршени дури 20 емисии на обврзници за денационализација, односно хартии од вредност со кои на сопствениците на одземените имоти на рати им се враќа долгот на државата по тој основ, ќе бидет потребни уште две емисии, и тоа првата во вредност од девет, а втората од осум милиони евра. Или, мора да се направат уште две емисии на вакви обврзници.

Затоа власта планира да направи измени во Законот за издавање на обврзници на Македонија за денационализација. Имено, во сегашниот закон се предвидени 20 емисии на обврзници за денационализација, а Владата со одлука годишно го утврдува износот на обврзниците што се издаваат, врз основа на надоместокот даден во обврзници со решенијата кои станале правосилни во тековната година. Почнувајќи од 2002 година па се досега земјава изврши 20 емисии на обврзници за денационализација, во вкупен износ од 386,5 милиони евра.

Како што објаснуваат од Владата, состојбата на долгот по основ на издадените обврзници за денационализација заклучно со крајот на октомври 2021 година изнесува уште 32,9 милиони евра.

„Процесот на денационализација заврши во првостепена постапка, но дел од решенијата не се конечни, односно по нив се уште се водат управни спорови или се вратени од судовите на повторно постапување. За да се овозможи исплата по овие предмети по нивната правосилност, има потреба од зголемување на бројот на емисиите на обврзници за денационализација. Со Предлог законот се предлага дополнително издавање на уште две емисии на обврзници за денационализација, со цел исплата на обврзниците кои ќе бидат утврдени со решенијата кои ќе станат конечни во претстојниот период“, објаснуваат од Владата која е предлагач на законот, а кој пред народните избраници ќе го брани министерот за финансии Фатмир Бесими.

Во ова законско решение се вели дека се носи со цел зголемување на бројот на емисии на обврзници за денационализација од 20 - на 22, како би можело да се опфатат барањата за денационализација по кои се одлучува во повторна постапка, а за кои е потребно дополнително издавање на обврзници, односно за да се овозможи исплата по решенијата за денационализација кои се уште не се конечни во управна постапка.

За спроведување на тој закон ќе бидат потребни дополнителни државни пари, и тоа околу девет милиони евра за 21-та и осум милиони евра за 22-та емисија на обврзници за денационализација.

Исплатата на овие обврзници ќе почне од 2023 година, и ќе тече во наредните десет години.

Овој закон ќе се носи по скратена постапка, а од власта тврдат дека причина за тоа е што не е во прашање обемен и сложен закон.

„Како резултат на дополнителните две емисии кои се предлагаат, со предлог законот ќе се овозможи исплата по барањата за денационализација по кои се водат спорови, а во кои како надоместок ќе се дадат обврзници“, велат предлагачите на законот.

Н.Н.Ф.