ЗАБОРАВЕТЕ НА ВИШОКОТ ТЕЖИНА, МАСТИТЕ СЕ ТОПАТ ПРЕД ВАШИТЕ ОЧИ - кој го злоупотреби политичарот и доктор Таравари на реклама за слабеење
Објавено во: Македонија 01 Мај, 2023
Претседателот на Алијанса на Албанците Арбен Таравари со предупредување до јавноста дека негова слика е злоупотребена и ставена на препарат за слабеење. Од институциите побара да спроведат истрага за случајот.
„Како лекар, длабоко сум загрижен за ширењето лажна реклама во мое име за производ за слабеење, за којшто се тврди дека придонесува за губење на телесната тежина.
Ги повикувам луѓето да бидат исклучително внимателни кога наидуваат на вакви содржини, коишто во дадени околности дури може да предизвикаат и големи штети по нивната здравствена состојба.
Мој приоритет отсекогаш бил грижа за здравјето и благосостојбата на граѓаните. Сите граѓани треба да имаат пристап до точни и веродостојни информации кога станува збор за нивното здравје и благосостојба.
Ги повикувам институциите да преземат мерки против ваквите лажни реклами коишто не само што можат да ги доведат потрошувачите во заблуда, туку и да предизвикаат сериозни здравствени ризици“, пишува познатиот доктор и политичар на својот фејсбук профил.