Заев: Нови мерки на почетокот на февруари, легализацијата на марихуана е и за борба против тешки дроги
Објавено во: Економија 05 Јануари, 2021
Мерките од петиот пакет за помош на домашната економија и на граѓаните во кризата поради пандемијата ќе бидат донесени најверојатно на почетокот на месец февруари, најави денеска премиерот Зоран Заев. На прашањето за сите проекти и мерки кои ги најавуваше претходно, на денешната прес конференција рече дека дебатата започнува викендот по Божиќ (иако најверојатно по грешка рече Велигден).
„После божиќни празници почнуваат дебати со сите синдикати, со коморите, универзитетски професори, граѓански организации за да се димензионираат новите мерки. Оставен е Велигден и завршувањето на викендот по 10 јануари за да се види здравствениот аспект. Во текот на цел јануари ќе се гледаат сите аспекти и почетокот на февруари да се носат мерките, рече Заев.
Тој додаде дека кризите се и можност за раст и зборуваше поединечно за најавите за нови инвестиции особено во енергетиката. На прашањето во кое беше споменат и бизнисот со марихуана, Заев рече дека тоа не е бизнис.
„Бизнисот со марихуана не е бизнис тука е пуштање на дебата во следните шест месеци да се искористат економските ресурси и потенцијали, односно за граѓаните да одгледуваат по неколку стебла, за економијата отворање социјални клубови. Секако ова е и во смисла на борба со тешки дроги хероин, кокаин и затоа се надеваме на позитивна реакција од нашиот народ, рече Заев.