Заев очекува 1 милијарда трговска размена со Турција, што ќе добие од Ердоган?
Објавено во: Македонија 12 Февруари, 2018
Македонскиот премиер Зоран Заев ја предводи владината делегација која е во посета на Турција и пред денешната средба со турскиот претседател Реџеп Таип Ердоган истакна дека очекува трговската размена со оваа блиска и пријателска земја да изнесува барем една милијарда евра.
Постојат можности за унапредување на економската соработка меѓу Република Македонија и Република Турција. Нашата цел е за неколку години трговијата со Турција да биде една милијарда евра. Ова вечерва го истакнал премиерот Зоран Заев пред турските бизнисмени, на вечерата во Анкара, организирана од ТОББ (TOBB) – Сојузот на стопански комори и берзи на Република Турција.
Македонскиот премиер Зоран Заев кој престојува во посета на Турција денеска ќе разговара со турскиот премиер Бинали Јилдирим, по што ќе следува и средба на делегациите од Македонија и Турција. Јилдирим и Заев ќе одржат и заедничка прес-конференција. Во текот на денот, премиерот Заев предвидено е да се сретне и со претседателот на Собранието на Турција Исмаил Кахраман и со претседателот на државата Реџеп Таип Ердоган.
Заев исто така очекува да продолжи трендот на турски инвестиции во Македонија и вчера повторно упатил повик до турските бизнисмени.
-Тука сме да пренесам отворена покана за инвестирање во Македонија. Свесен сум дека мојата земја ќе има напредок ако се развиваат приватниот сектор и инвестициите. Сакам да ви пренесам дека постои амбиент за инвестирање во Република Македонија. Со околу 35 инвеститори сме во преддоговор, со 10 имаме потпишано договори, а има 100-ци заинтересирани, потенцирал Заев.