АКО НЕ ГО ДОБИЕМЕ ОЧЕКУВАНОТО, МОЖЕН Е ПАД: Стабилната влада на Заев во раце на ЕУ
Објавено во: Македонија 06 Јуни, 2019
Постои можност проевропската влада која ја предводи премиерот Заев да падне.
Оваа опција тој ја најави како можна во Брисел доколку земјава не го добие очекуваниот датум за преговори со ЕУ, како и дека е можно тогаш на власт да се вратат националистички сили.
Како што пренесе Владата, Заев тоа го кажал во одговор на новинарско прашање какви ќе бидат последиците ако Европскиот совет не ја прифати препораката на Европската комисија Северна Македонија да отпочне пристапни преговори со ЕУ.
-Ако не го добиеме очекуваното, датум за преговори, има можност тоа да предизвика пад на владата. Оваа стабилна влада, со сите тешкотии, најверојатно веднаш ќе ја изгуби довербата во мнозинството во парламентот, бидејќи им ветивме дека ќе имаме позитивна одлука на ЕУ ако се движиме напред-кажа Заев.
Како што истакна, ако Македонија мора да оди на предвремени парламентарни избори економијата ќе запре, бидејќи никој не инвестира во време на подготовка на избори и договор околу нова влада.
-Ќе изгубиме шест месеци, а тоа за нас е најскапо време. Иако тоа е најлошата опција земјата ќе продолжи во овој правец, односно јакнење на европски идеи и јакнење на интегративниот процес на ЕУ-рекол Заев на конференцијата за новинари по форумот „Северна Македонија: забрзување на реформи, забрзување на европските интеграции“ во организација на ЕБРД и Центарот за европски политики.