БЕГАЛЦИТЕ НЕМА ДА ПРИДОНЕСАТ ЗА НОВО РАЗГОРУВАЊЕ НА КОВИД: Епидемиолошката состојба во Европа се смирува, но ќе има други проблеми, проф. Пановски

Добивај вести на Viber

Бројот на бегалци од Украина се поголем. Се проценува дека само за четири дена, од почетокот на војната, земјата ја напуштиле повеќе од половина милион луѓе. Во услови кога пандемијата на корона вирусот не е завршена, многумина стравуваат и од можно пролонгирање на крајот на Ковид-19, токму поради масовното движење на стотици илјади луѓе од една земја во друга. Сепак, според професорот Никола Пановски, со кого разговаравме, епидемиолошката состојба во моментов се смирува насекаде и не постои силен ризик од повторно разгорување на вирусот на подрачјето на Европа, ниту пак постои опасност од нова мутација на Ковид-19.

-По Кина, европскиот континет беше втор епицентар на пандемијата на корона вирусот, но тоа беше точно пред две години. Иако официјално не е ставен крај на Ковид-19, епидемиолошката состојба е далеку поинаква од тоа што го имавме. Генерално нема ризик за нови жаришта во Европа иако во моментов маса луѓе бегаат од завојуваните подрачја. Не верувам дека во Полска, каде што во моментов најмногу бараат засолниште, ќе има повторно шанса да се разгоре вирусот. Тоа нема да се случи ниту во Украина, каде што во моментов никој не ни размислува за антиковид мерки, што е сосема нормално во ситуација кога им се случува нешто многу пострашно, односно војна. Нема ризик ниту од нова мутација која би направила некои поголеми проблеми. Но, за жал постојат други проблеми при вакви хуманитарни катастрофи. Најмногу страдаат повозрасните. Менталните болести се на врвот поради сите преживеани моменти при тоа долго патување во неизвесност. Што се однесува пак до конкретно хоспитализираните пациенти поради компликации од корона, ќе има поголеми проблеми. Во Украина веќе недостасува кислород, а од друга страна, болниците се полнат и со ранети пациенти од војната. Тоа е навистина загрижувачка состојба, вели професорот Пановски.

Во однос на контролирањето на корона вирусот, деновиве камерите на многу светски телевизиски сервиси забележуваат дека при влезот во Полска, на пример, постојат пунктови каде што на бегалците им прават тестирања за Ковид-19. Здравствените власти во земјите кои масовно ги згрижуваат луѓето од Укарина, ги преземаат сите заштитни мерки и од Ковид-19.

Освен тоа,ЕУ вчера објави дека на бегалците од Украина ќе им биде дозволено да останат три години во замјата-членка во која избегале од војната, а веќе се работи на нацрт-предлози со кои освен што ќе им се обезбеди заштита, ќе може да работат во блокот од 27 земји-членки до три години. „Сите земји-членки на ЕУ се подготвени да прифатат бегалци од Украина“, изјави германската министерка за внатрешни работи Ненси Фезер, додавајќи дека земјите-членки „стојат во солидарност со народот на Украина“.

Анита Буховски