Белград е епидемиолошка бомба, се наоѓаме на работ: Д-р. Кон за состојбата со корона вирусот во Србија
Објавено во: Балкан 25 Јули, 2020
Има места во Белград
каде што вирусот може да експлодира, изјави српскиот епидемиолог Предраг Кон,
кој предупреди дека главниот град на Србија е епидемиолошка бомба. Утринава за
РТС, Кон истакна дека моменталната состојба со Ковид-19 е многу сериозно
прашање.
-Епидемиолошката крива се стабилизира, но одиме по самата ивица. Во моментов, Белград е вистинска епидемиолошка бомба затоа што има огромен број места каде вирусот одеднаш може да започне да се пренесува. Апелирам на почитување на мерките и на вклучување на сите инспекциски тела, комуналната полиција и сите оние кои треба да контролираат дали се спроведуваат мерките, да нема случајно продолжено престојување во барови, кафулиња, што може да се види и за што имам пријава и извештај. Многу е важно да се разбере, ние сме сега за време на викендот, тоа беше времето кога порано го решававме со полициски час. Сега тоа го нема и имаме само сопствена свест и многу е важно да ја контролираме, изјави д-р. Кон.
Тој нагласи дека е многу важно да се разбере моментот дека вирусот е кај луѓето и дека релативно слободно се пренесува, пред се поради тоа што веќе нема полициски час во Србија, нагласувајќи дека е задолжително да се носат маски и во затворен и на отворен простор, секаде каде што нема безбедно растојание.