Дали политичките пазарења го подриваат кредибилитетот на функцијата пратеник?

Добивај вести на Viber

Политички пазарења, исклучувања од партии, пратеници кои решаваат да делуваат независно, менување на ставови по важни прашања за многу краток рок, се работи на кои бевме сведоци изминативе години.

Луѓето кои претходно се занимаваме со политика, и ја обавувале функцијата пратеник велат дека ваквите појави го подриваат и уништуваат кредибилитетот на функцијата пратеник. Сметаат дека пратеникот треба да работи во интерес на граѓаните, а не за свој личен интерес.

„Еден пратеник кога ќе добие мандат, треба да го истера тој мандат во партијата преку која влегол во Собранието, гласачите на таа партија му дале доверба, и откако ќе му заврши мандатот, да паузира неколку години од политичките случувања, да не ја коментира својата партија, или некоја друга. Политиката е проклета професија“, вели Фатмир Асани, поранешен пратеник.

Бранко Арсовски, поранешен пратеник објаснува дека пратениците се политички работници кои често се на тапет, и се критикувани дека не работат, или дека работат за свој личен интерес. Тој вели дека слабости има во партиите, затоа што пратеници не секогаш стануваат најдобрите, туку најпослушните.

„Додека јас бев пратеник, во првиот и вториот собраниски состав немаше такви појави. Пратеникот мора да биде храбар, да има силен кредибилитет и интегритет. Ако еден човек е професионален во тоа што го работи, ако изградил кредибилитет и силни морални вредности, ниту пари, ниту престиж, ниту функција, не можат да го купат. Ако јас се продадам за некакви привилегии, како ќе се појавам меѓу народот, во мојот град и околните села, јас не би бил ниту личност во тој случај“, рече Арсовски.

Вели дека сите пазарења на политичко ниво придонесуваат граѓаните да немаат доверба ниту во пратениците, ниту во политичарите воопшто.

Во земјава минатата недела имаше превирања на политичката сцена, откако требаше да се гласа за доверба на Владата, а пратеникот Кастриот Реџепи не дојде, по што тврдеше дека  се премислил, но и дека добивал закани. БЕСА го исклучи од своите редови.  Претходните години пратениците беа критикувани за висината на патните трошоци кои ги добивале, за вработување на нивни блиски, за недоаѓање на седници, а има и такви кои многу ретко се вклучуваат во дискусиите.