Ден Дончев го напушта Фондот за здравство со 32 милијарди денари
Објавено во: Економија 06 Мај, 2020
Ден Дончев како директор го напушта Фондот за здравствено осигурување со приходи од 32 милијарди денари собрани главно од придонеси од бруто-плати, покажува објавената завршна сметка на ФЗОМ за 2019.
За повеќе од две и пол години колку што беше прв човек на фондот, приходите се зголемени за околу 5,5 милијарди денари, односно за 90 милиони евра разлика од 2017 до 2020 година.
Дончев стана директор во август 2017 година. Тој на парламентарните избори во 2016 г. беше носител на листата во првата изборна единица од коалицијата „ВМРО за Македонија“ и важи за близок до екс-министерот за внатрешни работи Љубе Бошкоски.
Во 2017 пред тој да стапи на функција фоднот имаше приходи од 26,6 милијарди денари, од кои само 14,34 милијарди од придонеси од бруто-плати. Билансот покажува дека крајот на минатата година бил завршен со приходи од 32 милијарди денари и расходи од 31,25 милијарди.
На вчерашната 49-та седница, Владата ја прифати оставката на Даниел Дончев од позицијата директор на Фондот за здравствено осигурување на РСМ, поради приватни и семејни причини, како што е наведено во текстот на оставката.
Претседателот на СДСМ, Зоран Заев, во вчерашното гостување на ТВ24 рече дека се обидел да го убеди Дончев да остане до крајот на мандатот на владата, но дека тој бил решен да си замине уште од март.