Вистинско време е на Белград да му се каже дека европската интеграција на Србија ќе почне откако земјата ќе се пријави за членство во НАТО, изјави бугарскиот европратеник и поранешен амбасадор на Бугарија во Македонија, Александар Јорданов.
„Вистинско време е на Белград да му се каже дека европската интеграција на Србија ќе почне откако земјата ќе се пријави за членство во НАТО. Проширувањето на Европската Унија на западен Балкан е процес кој може да се гарантира само ако земјите ја гарантираат својата безбедност. Односно, Србија треба да се збогува со својата идеја дека еден ден ќе стане членка на ЕУ ако не стане членка на НАТО. На Балканот се важни оние земји кои го придвижуваат развојот на регионот. Тоа се членките на ЕУ: Бугарија, Грција и Романија. Останатите би требало да ги измерат своите чекори, споредувајќи ги со нашите: како ние успеавме да постигнеме толкав успех и да станеме членки на ЕУ, какви реформи спроведовме“, кажа тој.
На регионалните политичари им порача „да бидат поскромни во своите изјави“ на сметка на „таквите лидери како што е Бугарија“, мислејќи на српскиот шеф на дипломатијата Ивица Дачиќ кој имаше одредена преписка со бугарскиот премиер Бојко Борисов за Косово, по што Борисов бараше јавно извинување.
