ФИЛИПЧЕ НАЈАВИ: Се подготвуваат болничките капацитети за можен наплив на пациенти

Добивај вести на Viber

Болниците низ цела Македонија се подготвуваат за постлетниот период, најави министерот за здравство Венко Филипче, но истовремено изрази надеж дека нема да бидат пополнети капацитетите кога на есен се очекува поголем наплив на пциенти со сезонски грип, ковид и други респираторни заболувања.

-Веќе сега правиме план за здравствените капацитети. Дел од овие капацитети сега се користат, а за дел се прави план и подготовка за снабдување со доволен број на кревети.Институтот за белодробни заболувања во клиничкиот центар сега е целосно празен и спремен да прими пациенти со соодветен стручен кадар. Понатаму болницата во Козле ни е на располагање. Таму сега има десетина пациенти и лекари кои што се на ротација со цел да се намали притисокот каде што сега се лекуваат. Болницата во Лешок, Јасеново, Кавадарци и други капацитети, но целта не е да се зафатат сите овие кревети. Целта е да го спречиме тоа. Една од работите која ја дискутиравме со Фабио Скано, експертот од СЗО е тоа кој момент е вистински ако треба да се донесе дополнителна рестрикција во движењето за да се намали трансмисијата, ако сметаме дека тоа е единствениот механизам, рече Филипче.

Тој истакна дека се надева дека се поголем број граѓани ќе ја сфатат сериозноста на проблемот и ќе се придржуваат до мерките, зашто тоа е најдобриот и најефикасниот механизам да се спречи ширењето на вирусот.