(ФОТО+ВИДЕО) СИЛЕН ВЕТЕР НА БАЛКАНОТ: Во многу градови нема струја, урнати се дрвја и минаре

Добивај вести на Viber

Делови од Балканот денеска беа погодени од силен ветер кој предизвика материјални штети, проблеми во сообраќајот и прекини на снабдувањето со струја и вода.

Силниот ветер, кој дува низ цела Хрватска предизвика значително проблеми во сообраќајот. Од невремето најмногу е погоден реонот на Горски Котар, кој е целосно отсечен. 

Во тој дел на Хрватска се затворени сите државни и локални патишта, првенствено поради опасноста од паѓање на дрвја. 

Дел од автопатот Ријека-Загреб е отворен само за патнички возила, додека на Јадранската магистрала меѓу Нови Винодолски и Сењ забранет е сообраќајот за катни автобуси, мотори и возила со камп приколки.

Хрватскиот автоклуб предупредува на влажни коловози и можни одрони во Истра, хрватското приморје, Горски Котор и во централна и северозападна Хрватска.

Во текот на денот беше затворен и граничниот премин Грушковје-Мацел кон Словенија поради лизгање на земјиштето, паднати дрвја и одрони.

Неколку патни правци во Словенија се непроодни, а многу домаќинства во земјата се без струја и вода.

Во централниот дел на Словенија, во регионот на Љубљана, околу 18.000 домаќинства немаат електрична енергија. Без струја останаа и 10.000 потрошувачи во областа Марибор. 

Во северозападниот дел од Словенија, затворени се основните училишта, а во реонот на Корушка и Целје ветрот ги однесе покривите на неколку куќи и деловни објекти.

Ветерот откорна многу дрва, поради што се непроодни и главните патишта, додека автопатот Драженци-Грушково, кој води кон Хрватска, е затворен поради одрони.

Во БиХ има голема штета во неколку општини.

Во Тешањ, е урнато минарето и се нанесени штети на една џамија, поради што се оштетени и неколку објекти, кои се наоѓаат во близина.

Во населбата Јеваџије е однесена покривна конструкција на станбена зграда, а во местото Радуша е урнат електричен столб.

На територијата на општина Маглај, силниот ветер уриваше стебла и покриви на куќи.

Во Бања Лука, ветровите достигнуваат до 100 километри на час, а три лица се повредени кога ветрот урна покриви на две места.