Градоначалникот на Ресен по првиот позитивен случај во градот: Повикав итна седница на кризен штаб

Добивај вести на Viber

Живко Гошаревски, градоначалникот на Ресен, кој заедно со Свети Николе до сега беа единствените градови кои немаа заболени од корона-вирусот, објави дека дека во теков на денешниов ден на терен се присутни тимови од Центарот за јавно здравје за спроведување на епидемиолошко истражување за сите што биле во контакт со лицето, за кое резултатот е позитивен.

„Почитувани сограѓани, Ресен од почетокот на пандемијата го бележи првиот случај , позитивен на Ковид -19. Во теков на денешниов ден на терен се присутни тимови од центарот за јавно здравје , кои спроведуваат епидемиолошко истражување за сите кои биле во контакт со лицето , за кое резултатот е позитивен . Повикав итна седница на кризен штаб, за која дополнително ќе бидете известени за сите мерки и активности.
Место за паника нема“, објави Гошаревски.

На граѓаните им порача дека мерките и препораките остануваат исти - одржување на дистанца, носење заштитни маски, редовна хигиена.

„И општина Ресен, и јас како градоначалник, но и Вие како одговорни граѓани, мора сите заеднички да дадеме се од себе за што побрзо исчезнување на невидливиот непријател од нашата општина“, додава градоначалникот.