Грчката дијаспора на средба со Нимиц - каква кампања се води против Македонија?
Објавено во: Балкан 26 Септември, 2016
Според пишувањата на грчките медиуми, претставници на грчката дијаспора во Америка, пред неколку дена повторно се сретнале со посредникот во спорот за името, Метју Нимиц.
Како што јави МИА од Атина, Грците во САД подолго време водат кампања за повлекување на одлуката на американската администрација од ноември 2004 година со која го призна уставното име на Република Македонија.
За последната средба меѓу американските Грци и Нимиц, не се соопштуваат други детали, освен дека е дел од „кампањата на Грците во Америка за повлекување на погрешната одлука на Владата на САД од 2004 година за привремено признавање на Скопје под името ‘Македонија’ која продолжува на повеќе нивоа“.
Организацијата на Грците во Америка, „Пан-Македонска асоцијација“ во април годинава поднесе петиција до администрацијата на Обама со која бара „да се повлече Извршната наредба од страна на администрацијата на Буш од 2004 година, со која земјата ‘ПЈРМ’ ја признава како ‘Република Македонија’”.
Грчкиот весник „Контра Њуз“ објави дека претставници на грчката дијаспора се сретнале со медијаторот, при што „Нимиц ја призна грешката на Џорџ Буш, а и високи претставници на американската политиката денес го признаваат погрешниот чекор од 2004, правдајќи се дека биле под илузија дека ќе го олеснат постигнувањето договор меѓу двете држави“.
И грчкиот шеф на дипломатијата, Никос Коѕиас, за време на престојот во Њујорк, минатата недела се сретна со претставници на грчката дијаспора кои го информирале за текот на нивната кампања во врска со името на Македонија.
Коѕиас се сретна со Нимиц, но не се соопштени никакви детали.
Неодамна тој најави дека по изборите во Македонија двете земји треба да разговараат за името.