Грчкиот парламент ги одобри пензиските реформи

Добивај вести на Viber

Парламентот во Грција ги одобри официјално пензиските и даночни реформи, неопходни за добивање на нов пакет на помош од меѓународните кредитори на Грција.

При гласањето на промените, придружуван од бројни протести и немири низ целата земја, 153 пратеници гласаа „за“ промените и 143 „против“.

Сите 153 пратеници од владејачката коалиција - пратениците од крајно левичарската партија „СИРИЗА“ и суверенистката формација „Независни Грци“ ја поддржаа новата серија реформи . Опозицијата, без исклучок, гласаше против промените.

Потсетуваме дека реформата предвидува намалување на највисоките пензии, спојување на повеќе осигурителни фондови и зголемување на осигурителните придонеси и даноци, најмногу за луѓето со средни и високи примања.

Во меѓувреме, Грција беше блокирана од генерален штрајк кој ја парализираше земјата по повикот на синдикатите во знак на протест против реформата. Првично околу 20 илјади лица се вклучија во мирен протест пред парламентот синоќа, кој подоцна прерасна во немири и судири со полицијата. Демонстрантите фрлаа врз униформираните лица со камења, бомбички и столчиња, а тие од своја страна одговорија со солзавец.

Пакетот мерки беше одобрен од грчкиот парламент пред вонредната седница на Еврогрупата во Брисел денес, на која ќе се разговара за помош за Грција.