Груевски: Тргување со највисоките државни и национални интереси не смее да се дозволи

Добивај вести на Viber

Претседателот на ВМРО-ДПМНЕ, Никола Груевски упати честитка по повод Денот на независноста 8-ми Септември.

Вели дека како држава издржавме бројни искушенија и поминавме многу премрежја. Груевски наведува дека 26 години подоцна како народ и како држава повторно минуваме низ период во кој е потребно многу мудрост, храброст и одлучност во носењето на одлуките и делувањето. 

„Повторно минуваме низ период во кој се отвораат прашања што длабоко задираат во нашиот идентитет и немаме веќе ни малку простор и комоција да дозволиме непромислени одлуки чии последици би ги чувстувале долго во иднина. Антидржавните и антинационалните политики мора да ги оставиме зад нас. Тргување со највисоките државни и национални интереси не смее да се дозволи. Убеден сум дека единствени и сплотени, со јасно зацртана визија и цел, ќе успееме Република Македонија да ја направиме подобро место за живеење за сите нејзини граѓани, држава каква што сакаме да им оставиме на нашите деца“- стои во честитката на Груевски.

Потсетува дека доколку пред 26 години сонот на тогашните генерации била независна Македонија, сонот на нашата генерација е економски стабилна и просперитетна држава, единствена, меѓународно признаена и почитувана. Овие цели заедно со добро трасираниот пат кон ЕУ и НАТО се насоките кон кои се стремиме и за кои секојдневно треба да работиме. Груевски вели дека секој од нас има сон и идеи за својата иднина, но најважна е идејата за заедничка иднина.