Хан: Реформите мора да се направат за да се подобрат животите на луѓето

Добивај вести на Viber

Еврокомесарот за европска соседска политика и преговори за проширување, Јоханес Хан, в понеделник ќе ја посети Република Македонија на разговори за плановите за реформи на новата Влада. 

Тој ќе ја повтори поддршката на Европската унија за земјата да ги спроведе неопходните реформи за во иднина да стане членка на ЕУ.

Предвидено е Хан да се сретне со премиерот Зоран Заев, со други претставници на новата Влада и со останатите политички лидери. 

Во изјава дадена пред неговото доаѓање во Македонија, Хан вели  дека ја посетува македонската држава за да даде поттик на спроведувањето на реформите што Брисел очекува да бидат спроведени во брз рок, а со цел да се врати на патеката за евро-атлантската интеграција.

„Со континуираната поддршка на Европската унија, земјата конечно ја надмина политичката криза преку добро администрираните избори и формирањето на новата Влада. Сега, новата Влада, заедно со опозицијата, треба да се фокусира на спроведувањето на Итните реформски приоритети и на целосно спроведување на договорот од Пржино, со цел да се врати земјата на патот кон интеграцијата во ЕУ. Реформите мора да се направат за да се подобрат животите на луѓето, да се работи за стабилност, просперитет и правда“ - изјави комесарот Хан. 

Група на независни високи експерти за владеење на правото, предводена од Рајнхард Прибе веќе е во Македонија, за да ја советува новата Влада за прашањата на системското владеење на правото.