Иванов „поим нема“ што содржи нацрт предлогот до Грција

Добивај вести на Viber

Претседателот на Македонија Ѓорге Иванов не е запознаен со грчката-нацрт спогодба доставена до македонската влада. Тој не е ниту  информиран за содржината на нацрт-спогодба за спорот со името испратена од македонска страна до Атина, велат од кабинетот на претседателот.

„Претседателот Иванов и неговиот кабинет ниту се информирани, ниту биле вклучени во формулирањето на предложениот нацрт-договор до грчките власти, што го обелодени премиерот Заев. Претседателот Иванов не е информиран ниту за нацрт-договорот што Република Грција го доставила до Владата на Република Македонија“, велат од кабинетот на македонскиот претседател.

Во однос на посетата на Коѕијас, од Кабинетот на претседателот Иванов велат дека до нив не е пристигнато барање за средба со шефот на грчката дипломатија, и поради тоа не е планирано претседателот Иванов да го прими министерот Коѕијас.

Се поставува прашањето зошто претседателот не беше инволвиран во овие случувања.
 
Министерот Димитров на прес-конференција изјави дека за процесот е подобро да се одвива на овој начин, а да не се води преку медиуми.
„Ние, повторно учејќи од лекциите во целиот процес, формалниот дел, неформалниот дел, медиумската комуникација, одлучивме дека е подобро да работиме и да сработиме, отколку да најавуваме“, рече Димитров.

Од страна на македонската дипломатија во тајност беше држено и дека од наша страна е изработена нацрт-спогодба која е испратена до Грција. Јавноста со оваа нацрт-спогодба воопшто не беше запознаена.

Очиледно е дека сето ова во тајност било држено и за претседателот Иванов, кој не е запознаен со овие нацрт-спогодби и со нивните содржини. Но дали причината е тоа што  Иванов и Владата се од различни политички партии и поради притисокот кој владее во нив?!

За разлика од македонската, грчка дипломатија се подготвува во преговорите и преку ,,специјална војна‘‘ што ја води преку медиумите со постојани анкети и анализи за мислењето на јавноста.

Останува да видиме дали оваа тајна дипломатија ќе стави крај на деценискиот спор.