Јакимовски смета дека му се врши притисок бидејќи најави бојкот на референдумот
Објавено во: Македонија 07 Август, 2018
Финансиската полиција води постапка за спроведување на три јавни набавки во Општина Карпош додека со неа управувал Стевчо Јакимовски.
Во неговиот дом денеска е извршен претрес.
Јакимовски вели дека двете јавни набавки се спроведени во 2012 година и се однесуваат за бараките каде е сместена општината, додека третата јавна набавка е поврзана со изградба на плоштадот во Жданец.
Додава дека во првиот случај општината водела долгогодишен судски спор со компанијата-изведувач, меѓутоа не била повлечена банкарската гаранција, додека во вториот случај работите се извршени согласно договорот.
Јакимовски рече дека нема никаква одговорност, затоа што потпишува одлука за јавна набавка, а се понатаму работат службите.
„Службите заборавиле да ја активираат банкарската гаранција, но и во едниот и во другиот случај нема ама баш апсолутно никаква врска со мене како градоначалник. Им стоиме на располагање за се штo треба, максимално ќе соработуваме со истражните органи да се расчисти оваа работа“ – вели Јакимовски.
Тој смета дека во позадината на оваа постапка е да се изврши притисок пред претстојниот референдум. Неговата партија ГРОМ најави дека ќе го бојкотира референдумот закажан за 30 септември.