Коѕијас се накани да дојде во Скопје со предлог договорот
Објавено во: Македонија 16 Март, 2018
Грчкиот министер за надворешни работи Никос Коѕија по многу „натегања“ за кои се пишуваше во Грција, конечно утврди датум за официјална посета на Скопје при што ќе оствари средба со македонскиот прв дипломат Никола Димитров, а притоа ќе го достави и грчкиот предлог договор за решавање на спорот за името кој трае со децении.
Коѕијас ја откажа посетата на САД поради смената на државниот секретар Рекс Тилерсон каде транзицискиот период во Стејт Департментот ќе трае до 31 март. Тоа значи дека САД нема да може да приложи целосен дипломатски напор се додека функцијата не ја преземе Мајк Помпео, екс директорот на ЦИА кого го одбра Трамп.
Грчкиот прв дипломат во Скопје ќе пристигне идната недела на 22 март со директен лет од Атина на Скопскиот меѓународен аеродром. Ова ќе биде симболично одбележано како првиот директен лет од Атина до Скопје по цели 12 години.
Наредниот ден, според најавите од Грција, Коѕијас треба да има средба со претседателот Ѓорге Иванов, со премиерот Зоран Заев, лидерот на ДУИ, Али Ахмети, како и со претседателот на ВМРО-ДПМНЕ, Христијан Мицкоски. Но, овие средби засега не се потврдени.
Што точно ќе содржи нацрт предлогот од грчка страна засега е неизвесно, освен што е познат долго повторуваниот став дека Грција очекува решение за севкупна употреба, со сложено име со географска употреба и во последно време промена на македонскиот устав во одредбите кои според нив генерираат иредентизам.
Како македонската страна ќе одговори на овој предлог ќе зависи од самата содржина. Досега политичкиот врв предводен од Заев истакнуваше дека решението мора да биде достоинствено без нарушување на идентитетските одредници, но сосема извесно е дека Македонија ќе биде ставена под поголем дипломатски притисок во наредниот период пред одржување на НАТО самитот во јуни.