Kои пет држави ја блокираа Србија да отвори уште едно поглавје?

Добивај вести на Viber

Пет држави го блокирале најавеното отворање и на поглавјето 33 од преговорите за членство на Србија во ЕУ, кое се однесува на финансиските и буџетските прашања, јавија денеска српските медиуми, повикувајќи се на извори во Совет на министри на Унијата.

Се работи за Германија, Франција, Шведска, Велика Британија и Хрватска. 

Овие држави, но и уште неколку други членки на ЕУ, при одлуката за блокирање на отварањето по ова поглавје, во целина ја зеле предвид полугодишната анализа на Европската комисија за имплементација на акциските планови на српската Влада за претходно отворените поглавја 23 и 24.

Во интерен документ на Европската комисија за напредокот на Србија по поглавјата 23 и 24 за владеењето на правото, стои дека земјата мора да ги интензивира своите напори во областа на финансиските истраги, спречувањето на перењето пари и конфискација на имотот и донесување на ефикасни правила за азил во согласност со законодавството на ЕУ.

Србија на меѓувладината конференција во Брисел отвори две нови поглавја во своите пристапни преговори, пренесуваат српските медиуми.

Отворени се поглавјето 6, кое се однесува на компаниското право, и поглавјето 30, кое се однесува на економските односи со странство.