Љупчо Николовски: ДУИ ретерира од првичните коментари
Објавено во: Македонија 23 Јули, 2020
Љупчо Николовски, генералниот секретар на СДСМ, одговарајќи на прашање во денешното интервју за „Локално“ вели дека на ДУИ му успеал трикот во кампањата за прв премиер Албанец на Македонија со резултирање на најголем број на гласови во „албанскиот блок“.
Ова Николовски го коментираше на прашањето дали двете најголеми македонски партии се губитници на предвремените парламентарни избори.
- ДУИ решија да играат на неостварливо популистичко решение со кое привлекоа повеќе гласови и во албанскиот блок освоија најмногу гласови. Сепак, дали ваквите трикови ќе им се исплатат долгорочно е друго прашање, вели поранешниот министер за земјоделие, шумарство и водостопанство.
Можната ротација на премиер во текот на мандатот ја оцени како шпекулација и лажна вест.
- Ова не е време ниту за нови предвремени избори, ниту за технички влади, ниту за ротации – ова е време за стабилна влада која ќе одработи цел мандат за доброто на граѓаните, влада фокусирана на економијата, правдата и преговорите со ЕУ. Следат предизвици со ковид кризата, мора да се работи посветено од првиот ден, одговара Николовски во интервјуто.
Николовски е категоричен дека Зоран Заев, претседателот на СДСМ, ќе биде премиер, а настапот на Бујар Османи дека ДУИ треба да го добие мандатот за составување на Влада го оцени како арогантен.
- Парламентарниот систем во Република Северна Македонија е јасен. Мандатот за формирање влада го добива партијата којашто ќе освои најмногу пратеници. Првопласираната партија добива мандат да составува влада, а не третопласираната партија. Ова беше непотребна ароганција која низ годините стотици пати се покажала како штетна по националните интереси. ДУИ има 15 пратеници и ние тоа го почитуваме, но од такви изјави немаше потреба. Сепак, веќе гледам дека колегите од ДУИ ретерираат од првичните коментари, смета функционерот на СДСМ.