Медицински лица од други градови го засилуваат персоналот на Инфективна клиника и ГОБ „8 Септември“

Добивај вести на Viber

Медицински лица од градови каде што нема интензивна борба со корона-вирусот на две недели ќе помогнат во Скопје така што ќе го засилат персоналот на Инфективната клиника во комплексот „Мајка Тереза“, како и во ГОБ „8 Септември“.

Здравствени работници од Кочани, Велес, Кавадарци и Кичево пристигнуваат во Инфективната болница со привремена прераспределба на новите работни места од само две недели.

Оваа мерка се реализира по барање од Министерството за здравство, поради недостатокот од медицински кадар на Клиниката.Ќе им помагаат на своите колеги во лекувањето на пациентите заболени од Ковид-19 кои се хоспитализирани во Скопје.

- Постапуваме според претходно утврдени упатства од Министерството за здравство и овој одлив на кадар нема да влијае на нормалното функционирање на нашата болница. Располагаме со доволен лекарски и друг медицински персонал, поради што позитивно одговоривме на барањето на ресорното Министерство, истакна Александар Серафимов, директор на Општата болница со проширена дејност во Кочани..

И здравствен тим од двајца доктори и четири медицински сестри од Специјализираната болница за превенција, лекување и рехабилитација во Отешево, Преспа, денес пристигна во Скопје да помогне во работата на Ковид-центарот.

Нивната привремена работа овдека исто така ќе трае две недели со престој во Скопје со хотелско сместување обезбедено од Министерството за здравство. Како што расте бројот на болни, КОВИД Центарот во „8 Септември“ има потреба од медицински кадар, на што се одзваа лекарски тимови од внатрешноста на земјата.