Меркел неделава спречи да избие војна во регионот?
Објавено во: Балкан 23 Јули, 2020
Германските медиуми пишуваат дека канцеларката Ангела Меркел неделава спречила воен судир меѓу Турција и Грција.
Во Средоземното Море во вторникот имаше тензии меѓу Грција и Турција околу малиот остров Кастелоризо во близина на турскиот брег.
Oвие несогласувања за малку ќе ескалирале во судир. Телефонски повик на Ангела Меркел спречил ескалација буквално во последен момент, пишува германскиот таблоид „Билд“, а пренесе „Дојче веле“.
„Билд“ пишува дека причината за конфликтот меѓу двете земји се пробните дупчења во потрага по нафта и гас, што Турција ги спроведува во непосредна близина на грчките острови, во зоната која Грција ја смета за т.н. Ексклузивна економска зона (ЕЕЗ). Станува збор за морска област во радиус од 200 наутички милји околу овој остров.
Германскиот весник наведува и дека поради ваквата ситуација, во вторникот попладне 18 турски воени бродови биле на пат кон островот. „Билд“ исто така јавува дека Грција ја ставила својата армија во состојба на целосна борбена готовност.
„Но, тогаш се вклучила германската канцеларка Ангела Меркел. Таа прво остварила телефонски разговор со турскиот претседател Реџеп Таип Ердоган, а потоа и со грчкиот премиер Киријакос Мицотакис. Резултат: Турција повлекла 16 воени бродови, сепак оставајќи два во близина на островот. Но, потегот предизвикал олеснување кај обете страни во Егејското Море“, истакнува „Билд“.
Потегот на Турција ги вознемири грчките власти.„Турција ја зголеми агресивноста кон Грција, Кипар и Европската унија во целост", изјави тогаш грчкиот премиер Киријакос Мицотакис.
Тензиите меѓу двете земји постојат со години.