МИЦКОСКИ: Македонија ќе биде земја со најголем број на странски инвестиции по глава на жител во Европа

Добивај вести на Viber

Премиерот Христијан Мицкоски вели дека Македонија ќе биде земја со најголем број на странски инвестиции по глава на жител во Европа.

„Одлучивме сите оние коишто се заинтересирани и коишто се во процес да ги повикаме да ги сослушаме и да видиме дали можеме да најдеме заеднички јазик и како можеме да ги донесеме кај нас да инвестираат. Она кое што е важно е дека милијардата ја поминавме во ноември, милијарда и 40 милиони евра, за декември чекаме, во февруари од прилика ќе се знае каква ќе биде состојбата со инвестициите оваа година. Но, она кое што е многу значајно е што од мај до ноември имаме 120 милиони евра месечно инвестиции“, изјави Мицкоски.

Мицкоски посочи дека очекува во февруари Македонија да биде земја со најголем број на странски инвестиции по глава на жител во Европа.

„Ние со оваа милијарда која што очекувам да биде конечно во февруари, ќе бидеме земја со најголем број на странски инвестиции по глава на жител во Европа. Нешто што одамна не сме биле, се сеќавате бевме на дното“, додаде премиерот. 

Мицкоски вели дека ова е многу важно, затоа што во пресметката на БДП во услови на криза во автомобилската индустрија и намалено индустриско производство, во услови на намалена побарувачка на суровини од нашите рудници, странските инвестиции, туризмот, услугите и земјоделието се тие кои што треба да го покријат тој недостаток, односно таа разлика која што ќе се случува во БДП.