Мицкоски: Заев се бори да го смени името за да си ја задржи својата фотеља
Објавено во: Македонија 15 Септември, 2018
„Заев се бори да го смени името за да си ја задржи својата фотеља“ им кажал на Беровчани опозицискиот лидер Христијан Мицкоски по средбата со граѓаните.
Мицкоски пред граѓаните на Берово потенцирал дека СДСМ иако во предизборието ветуваа дека ќе донесат живот за сите граѓани, не само што не донесоа туку на сите граѓани во Република Македонија им го направија потежок животот.
„Ниту има домашни инвеститори,а странските исчезнаа и заминаа во соседните држави, државата од лидер во регионот сега е на последно место и нема нови инвеститори“, рекол Мицковски кој им посочил да не веруваат во лагите на Зоран Заев.
- Кога вели дека ќе викнел некој да не камшикува. Камшик му треба него, затоа што има држави во светот каде што престапниците и криминалците со камшикување ги казнуваат, среќа он се родил во држава како Македонија па такви казни не постојат. Ниту некој го камшикувал, ниту некој ќе го камшикува македонскиот народ, ниту во минатото, ниту тоа ќе биде случај во иднината, истакнал Мицкоски.
Во врска со убедувањата за договорот со Грција кој велат дека е добар тој истакна дека договорот не е ни малку добар, ниту пак е некаков компромис туку капитулација.
-Знаеме дека договорот кој што го потпиша владата на СДСМ со нашиот јужен сосед не е ни малку добар, не ни компромис туку капитулација и затоа кажавме дека не можеме капитулацијата да ја прифатиме како лидерство, не можеме поразот да го прифатиме како победа и нашиот став е единствен и непроменлив а тоа е дека за ВМРО-ДПМНЕ овој капитулантски договор е неприфатлив, вели Мицкоски.