Наместо за новогодишен рекламен материјал, ЕСМ ќе донира три милиони денари за болниците во Битола и Кичево

Добивај вести на Viber

Наместо да набавува новогодишен рекламен материјал Управниот одбор на АД ЕСМ одлучил оваа година тие средства да се пренасочат во помош за Клиничката болница во Битола и Општата болницата во Кичево, соопштија од компанијата.

„Конкретно, во АД ЕСМ имавме предвидено 3 милиони денари за рекламен материјал на ниво на целата компанија, и тие средства сега ќе бидат донирани за обезбедување централен довод на кислород во модуларните болници за ковид пациенти кои се градат во Битола и во Кичево. Во битолската болница комплексот ќе биде поголем, и таму се насочуваат 2.400.000 денари, а во кичевската болница потребата е 600 илјади денари.

Како АД ЕСМ проценивме дека во моментов здравството е тоа каде е најнеопходно да се помогне, и ја користам приликата да апелирам сите општествено одговорни компании да го направат истото согласно можностите, затоа што сите ние во одреден момент имаме потреба од медицинска нега. А,особено сега, кога секој еден граѓанин е загрозен” – изјави директорот на АД ЕСМ, Васко Ковачевски на потпишувањето на договорите за донација.

Директорката на Клиничката болница во Битола, д-р Билјана Гагачовска, нагласи дека помошта е добредојдена и претставува значаен поттик за сите државни и приватни компании за помош на здравството во овој период кој е тежок за сите. Исто така, директорката Гагачовска потенцираше дека битолската болница ја има целосната поддршка од Владата, Министерството за здравство и од општина Битола.

Директорот на Општата болница во Кичево, д-р Станко Трпески, изјави дека помошта доаѓа во вистински момент, со оглед на тоа што модуларната болница во Кичево веќе се поставува и дека ова е првпат да имаат централен довод на кислород во рамките на болницата.