Неделен Фактор - Шок под маски

Добивај вести на Viber

Карневалите некогаш се одбележувале за крајот на постите, односно со прославите и месните трпези се почнувале новите циклуси во претежно паганските, а подоцна и во христијанските општества. Овој пат карневалот во Вевчани го одбележа "мрсната" интервенција на полицијата поддржана и од специјалните сили, па Вевчанци изедоа помалку ќотек и казни.

Научени се тие на сеопфатни полициски акции, не за џабе се "држава во држава", па ништо чудно и овој пат врз нив да биде тренирана полициската строгост.

А некој ќе рече па зошто толкава сила да се демонстрира од полицијата кога и онака сите во Вевчани носеа маски.

Некои прославуваат родендени и тоа без маски и се групираат повеќе од четворица во свечени сали на нови згради на државни министерства, не се не кријат дека не носат маски, се сликаат за историските моменти на радост за другиот и вечен лидер. Ама државата не затајува овој пат. Бам, на дело ги "почести" славениците по 20 евра. Дури 500 евра за организаторот на роденденот Артан Груби кој го пречека "албанскиот" дел од Владата.

Просто сме шокирани од ефикасноста на спроведувањето на законите кои нели ете важат еднакво за сите. Шокот со носење на маска најверојатно може и подобро да се сокрие. Ќе треба емотикони да користиме за да доловиме колку всушност сме шокирани што дел од обвинението за Сашо Мијалков екс директорот на ДБК во предметот Таргет-Тврдина застарува и нема да одговара во овој дел од судската постапка.

Ама дефинитивно не сме толку шокирани како што целосно во шок падна министерката за одбрана Радмила Шекеринска. Еден од предводниците на СДСМ просто не може да поверува дека му застарува делото на началникот за злоупотреби со опремите за прислушување, за оние за кои дознавме преку "шок бомбите" и за кои се добиваа избори. Шокот кој ја зафати министерката навистина ни делува како утеха, таа загриженост за остварување на ветувањата дека ќе има правда и дека ќе има мир.

Ако не може Мијалков да отиде до Идризово, може да оди до Штип да речеме. И тоа преку новиот автопат, оној граден со кинески кредити, ама официјално пуштен во употреба од новата Влада. И да плати дури 160 денари за патарини. За луѓето од Скопје и другите градови овој автопат може да биде и значајна артерија за поврзување на истокот на државата, а за други прескап и неисплатлив проект. Но, за Штип и околните населени места сигурно значи премногу, шанса за полесно водење бизнис, привлекување туристи и гости и побрзо и побезбедно патување. Арно ама Штипската Марија Антоанета, некогашниот градоначалник и актуелен министер за транспорт и врски им порача на сите кои се шокирани од високата цена на патарините да си патуваат ако сакаат преку селски друмови и околни патишта. Па не е автопат за секој обичен смртник. Вивнат по Версајските височини, Бочварски треба да знае дека еден ден ќе треба да се врати по истиот тој пат, ама тогаш ќе нема кој да му ги покрие патните трошоци како функционер.

Од карневалиите на политичарите никако да се заситиме, а богами ниту тие планираат во скоро време да се стават на еден долг "пост", колку толку да се исчистат. Да бидеме спокојни, лабаво другари, зарем уште може нешто да ве шокира?

Христијан Станоевиќ