Невенка Стаменковска: Административци нема да учествуваат во избирачките одбори
Објавено во: Македонија 13 Јуни, 2020
Според Невенка Стаменковска Стојковски, дополнителната заменик-министерка за информатичко општество и администрација од редовите на опозицијата, како што напиша таа на Фејсбук, десетици административци-членови на избирачките одбори нема да учествуваат во работата на гласачките места на денот на парламентарните избори доколку тие се одржат на почетокот од јули, како што најавува претседателот на СДСМ, Зоран Заев.
„Со Владата на СДСМ, административците имаат причина да бидат загрижени за сопственото здравје. Почитувани, кога десетици административци најавуваат напуштање на избирачките одбори поради страв од Ковид-19, тогаш тоа треба да биде сигнал дека политиките на Владата одат во многу погрешен правец. Одговорни политичари ваквата информација ќе ја разберат сериозно и ќе се обидат да се корегираат, но за жал станува се' повеќе јасно дека такви политичари не може да се најдат во редовите на СДСМ“, напиша меѓудругото дополнителната заменик-министерка.
Според Стаменковска, членовите на избирачките одбори се плашат да ги извршуваат должностите во услови, како што пишува таа, кога нашата земја руши рекорди по бројот на новозаболени од Ковид-19.