Од Брисел децидни: Нашето финансирање не вклучуваше изградба на огради
Објавено во: Балкан 21 Август, 2020
Портпаролката на Европската комисија, Ана Писонеро, како што објави МИА, изјавила дека Брисел им дава значителна финансиска и техничка помош на партнерите од Западен Балкан кога станува збор за управување со миграциите, а за таа цел во 2015 година издвои повеќе од 100 милиони евра за Србија.
„Сепак, тоа финансирање не вклучува изградба на огради, кои, како што беше погрешно објавено, не се дел од ниеден договор со ЕУ“, вели Писонеро.
Радио Слободна Европа пред неколку дена објави дека Србија почнала да поставува жичана ограда на границата со Северна Македонија во близина на Прешево, што треба да спречи евентуални масовни илегални преминувања. Претседателот на Општина Прешево, Шчиприм Арифи за РСЕ изјавил дека изградбата на жичана ограда е дел од договор со ЕУ.
Локалните власти во Прешево информирале дека оградата треба да биде долга 147 километри и оти според најавите од властите во Белград, таква бариера ќе се постави и на границата со Бугарија.
Српската Влада засега официјално не се изјаснила за поставувањето на оградата на границата со Македонија. Македонските власти, пак, тврдат дека поставувањето жичана ограда е на територијата на Република Србија, не и на територијата на нашата држава.